政壇:煲呔曾遺臭萬年

煲呔曾治港七年劣績斑斑,執包袱在即,佢竟然一連三日接受官方電台專訪,企圖為自己漂白,前日黑心詛咒香港隨時會畀歐債危機拖累而爆煲,尋日卻話希望市民唔好記得佢,禍港七年、做落嘅衰嘢一籮籮,梗係唔想有人記得佢啦,但古時秦檜殺害忠良,遺臭萬年,至今仍受到世人唾棄,更有人將佢製成油炸鬼洩憤,又被製成銅像長跪贖罪喇,可見禍害萬民嘅人即使化咗灰,市民都會記得佢。

煲呔曾喺訪問中叫市民記得多啲新特首,但就流露對新特首搶「地盤」嘅憂慮,佢話相信新特首係理智嘅,唔會強搶佢啲工作,仲睇死新特首做得唔慌好,甚至亂七八糟,因為新特首無行政權力喎,佢仲強調,行政權力喺七月一日之前,仲係由佢同政府負責,冇人可以干擾。

煲呔曾一貫小器兼記仇,呢啲性格喺訪問中亦有流露,佢話自己嘅四十五年政治生涯中,受過唔少人身攻擊,搞到連自己條底線喺邊度都唔知。做一區掌舵人搞到連底線都冇埋,相信古今中外只係得佢一個。佢又死撐被人寸夕陽政府係跛腳鴨政府,佢又話:「你哋話我跛腳都講咗幾年啦,但我哋有無跛到呢?」講大話唔眨眼,仲好意思問人。

唔肯講做特首代價

曾將「我要做好呢份工」掛在嘴邊嘅煲呔曾被問到覺得自己做成點時,佢話要等市民評價喎,話口未完又用「於心無愧」形容,話每分鐘都盡心盡力做好呢份工。禍港多年都可咁講,真係厚顏無恥。

佢又鼓勵後生仔女做特首,但就提醒佢哋要承擔工作上嘅光榮同代價,但佢就死都唔肯講做特首嘅代價係乜,淨係九唔搭八話自己今年六十七歲仲行得走得。不過,對於市民來講,煲呔曾做特首嘅代價就係惹來市民鬧爆,事關政治、經濟、社會民生各方面全部倒退,真係害人不淺,所以佢話卸任後會離港一段時間,但相信好多市民希望佢走咗唔好返嚟。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!

設計圖片