戲迷街坊 感慨無限

「真喺好唔捨得，我喺度做咗三十年，睇住佢（新光）一路變遷，到依家真喺要結業，唉！都唔知點講，你哋記得十八、十九號都嚟睇下啦！唔睇冇o架啦！」新光戲院旁的益壽堂涼茶舖多年來兼任新光戲院的小賣部，將隨着新光一同結業，負責人余先生娓娓道來無限感慨及昔日風光。

余先生說：「我哋好多客人都係戲迷，其他電影院客人鍾意食蔗，新光戲迷鍾意食口笠濕同乾果，我仲記得嗰時汪明荃嚟新光都幫襯我食龜苓膏；不過，要講風光，近年一定要數蓋鳴輝同湛江粵劇團，啲人真喺擺晒櫈仔排通宵買飛o架！」余坦言，現時未決定會否在鄰近找舖重置涼茶舖，「睇吓搵唔搵到舖啦！」

毗鄰牛雜店憂收回

位於新光旁的馳名牛雜小食店「十三座牛雜」亦可能被收回，該店在現址開業逾五年，每逢傍晚新光夜場開演，整條街都是食客，現時卻可能被收回，不禁擔心，「都唔知老細搵唔搵到其他舖位。」

除商舖外，北角的老街坊亦對新光難捨難離，亦抱怨業主要收回院址，七旬的周婆婆在新光戲院上住了數十年至今，她說：「我當時最鍾意就喺睇紅樓夢，鍾意到一個人都要去睇；賣飛員工同我好熟o架，嗰時每次都留啲好位畀我。」有戲迷便把握最後機會搶飛看戲，戲齡三十年的周女士昨展示戲票，自言成功「搭上搭」購入最後兩天的票，爭取最後機會在新光欣賞大戲。