《太陽報》恢復正價 現金券回饋讀者

各位讀者，各位觀眾，各位朋友，太一叮要宣布一個好消息，《太陽報》將於二月十一日，即明日起恢復正常售價六元！

喂喂喂，咪住先，大家可能會問，恢復正常售價，即係畀多一蚊買報紙，咁都算係好消息？一般而言當然唔算啦，之但係《太陽報》回饋讀者，非同一般，恢復正常售價嘅意思唔係畀多一蚊，而係畀少一蚊。唔明？等太一叮講到清清楚楚明明白白。

嗱，即係咁，《太陽報》明日起恢復正常售價六元，但就一連七日隨報附送二元百佳現金券回饋讀者，憑券去百佳超級市場購物可以享受二元優惠。呢條數好易計啫，讀者畀多一蚊買報紙，實際得到兩蚊回贈，一來一回等於賺咗一蚊，亦即係等於用四元就可以買到一份咁精彩嘅報紙；仲有吖，《太陽報》精益求精，內容不斷創新，新聞又快又準，副刊加強陣容，「Sun微博」暢所欲言，你話嘞，呢啲係咪好消息先！

大家都知，一份報紙最重要係內容精彩，可靠可信，否則送都冇人要啦。就好似淫賤黎旗下壹淫媒免費派發嘅《爽報》咁吖，內容唔精彩都算嘞，仲要搞到鹹鹹濕濕賤賤格格，接投訴接到手軟，送都冇人要之餘，更加激到大批團體發起杯葛行動，呼籲市民罷取罷看。

太一叮再要講嘅好消息就係，《太陽報》精彩內容陸續有來，各位讀者一定目不暇給。日常新聞唔使多講嘞，一以貫之就係報道翔實，觸覺敏銳，為民喉舌，敢說敢言，揭盡世間可揭之事，叮遍天下該叮之人。

太一叮今次要特別介紹嘅係副刊，太陽Sunlife將會加強特刊內容。好似逢星期二推出嘅「世界漫遊」咁吖，加入獨特旅遊內容，例如火車遊、單車遊以及自駕遊等等，搜羅世界各地繽紛有趣嘅不同活動。旅遊當然唔少得「地道美食」，相關內容唔單止可以令讀者增廣見聞，仲可以大飽口福添。而「旅遊優惠」顧名思義，就係教大家盡享機票同酒店等等優惠着數。

至於逢星期五推出嘅「汽車世界」，講嘅當然係車天車地啦，買乜嘢車好呀，點樣保養呀，如何美容呀，即使係改裝，讀者睇完都會獲益良多。

仲有呀，《太陽報》嘅「Sun微博」都係好嘢嚟o架，網民不但可以透過文字抒發己見，針對時事問題暢所欲言，更加可以透過ontv作為跨媒體發聲平台。你知啦，潮流興惡搞，「Sun微博」日日創作惡搞歌詞，既抵死又啜核，遲啲更加有機會變成MV版本，你都咪話唔盞鬼！

總而言之一句講晒，《太陽報》日日精彩，天天向上，恢復正價大家肯定會覺得物超所值！