SUN世代：踩行摩打奔向設計路

許多家族生意的後人，都理所當然接棒公司業務，陳王瑋（Joanna）亦不例外，但滿腦子創意的她，天生充滿藝術細胞，參與家人經營的摩打生意之餘，亦不忘開展自己另一條康莊大道，最近更憑藉個人才能，創立產品設計公司，蓄勢待發闖出一片天。

父親經營摩打生意二十八年，貴為太子女的Joanna畢業後，卻非立即回巢發展。滿身藝術氣質的Joanna，天生對藝術情有獨鍾，畫畫、設計、攝影樣樣皆能，在美國留學的她主修時裝設計，畢業後更曾在當地年輕設計師組織協助下，創出個人品牌，生產一系列的時裝：「當時都接到一啲單，但製作過程係需要人幫手，一個人實在難以兼顧，咁啱有美國公司喺香港請人，屋企又好miss我，就返咗香港發展。」

唔慣老竇變老闆

回港一心繼續做時裝設計，豈料事與願違：「返嚟發現份工似採購多過做設計，同返屋企幫手差唔多，而且屋企公司業務又擴展緊，好需要人手，於是返咗屋企幫手。」

摩打生意雖是家人的「老本行」，但對Joanna而言，一切都是新開始。「初頭好難適應，都遇到一啲困難。」她解釋，公司的廠房設在惠州，工作時發現內地和美國文化大為不同：「喺美國做嘢，同事遇到問題會即刻出聲，但內地嘅同事，就唔到最後關頭都唔出聲。」自此，她知道要主動了解內地同事的工作進度。同樣要適應的，還有與爸爸的雙重關係：「爸爸同時係老闆，有時放咗工都好似返工咁，不過爸爸做嘢好努力，係一個好好嘅學習對象。」熟習了公司的運作，Joanna卻沒有放棄對設計的熱愛，去年十月創立一間專為客戶做產品設計的公司：「自己希望多元化發展，create一啲嘢出嚟，有機會就去嘗試，不介意結果。」

而開設新公司，又要面對一項新挑戰：「公司新，人哋會擔心，我哋嘅客路同訂貨量會有幾多，想搵人幫手起一個模都有困難。」但她無氣餒，反而不停四處敲門，一直努力尋找願意作出新嘗試的合作夥伴。現時新公司仍處於起步階段，不過Joanna對前景充滿信心：「希望透過細模式同好嘅產品，令公司健康發展，做自己想做嘅嘢。」

Joanna's Profile

現職：海寶摩打廠有限公司營業部董事、20C Design Director

學歷：美國紐約Parsons School of Design藝術系學士

興趣：冰上曲棍球