SUN微博：瞬間看中港

「立法會值得我坐嗎？我一鋪牌已成千萬。」—詹培忠

金融服務界議員詹培忠表示14萬月薪不算高，又指外界無資格批評他，因他是由金融服務界選出。先別論點解佢講得出呢啲嘢，值得深思嘅係，點解佢唔去全職打牌？分分鐘做埋香港首富。

打橫嚟講：富貴閉翳屋

有關房協推出的「超級白金富貴長者屋」之荒謬劇，先有他們的行政總裁黃傑龍說「中到八百萬六合彩頭獎」就有資格入住，後有房協主席楊家聲話「七十四歲入住十年最細單位，先畀三百萬」。

如斯反智的計劃，被全城鬧爆之際，白髮蒼蒼的楊主席再在電台節目上噏：「（我哋房協）唔係將所有資源全部畀基層」，又「我哋呢個項目並唔係畀晒全香港七百萬人（所用的）。」

一個政府公營機構的頂頭揸Fit人，受咗咁多香港納稅人嘅人工，個腦竟度出啲咁嘅大計，一係要去青山驗吓屁股生毒瘤？或老廉應出手查吓中間之景轟！

香港本土資源唔益本地人，唔通留畀希臘歐洲人？美加？日韓菲律賓人？甚至鄰近尊貴的同胞？在此族群矛盾熾熱時，還火上加油，不特只無政治智慧，更是腦殘低B！

請問，上述兩位高官的入息，打政府工多年，退休後，夠唔夠錢入住超級白金屋呢？你哋都唔住？點解呀！又試問，那些超級富豪有錢人，又何解要孤苦伶仃一人住這五百多呎的假豪宅呢？最後，窮鬼更無資格啦！連去睇示範單位都無份啦！咁最終，起嚟養老鼠乎！

此鬧劇，再次暴露香港政府內的一群所謂高層的白癡思維，比我們想像的，更恐怖！