喺浸會大學民調「早洩」事件中,一直有人懷疑學校甚至校董會高層有介入事件,搞到浸大校董會主席Wilfred王英偉要出嚟嚴正澄清,總之就搞到好頭痕啦。
本身亦係藝術發展局主席嘅Wilfred,尋日應邀出席八和會館新春團拜,佢到場後,即時同班嘉賓雞啄唔斷,全日笑容滿面,見到佢心情靚,梗係上前同佢傾吓啦,點知呢頭打完招呼,嗰頭佢又畀其他嘉賓捉住。
佢唔得閒,八和會館主席汪明荃亦不遑多讓,全日滿場飛同班嘉賓甚至粉絲傾偈影合照,只見汪阿姐尋日一身鮮紅色打扮,睇落相當醒神。
王英偉忙住應酬,暫將浸大麻煩事拋開。