政壇：蘇永強開潮錶概念店
備受城中潮男型女追捧嘅潮錶品牌odm概念店，尋日正式進駐旺角朗豪坊，現場氣氛好熱鬧。odm係時運達集團旗下自家品牌，老闆兼香港錶廠商會會長阿Paul蘇永強同大女Sarah蘇漫瑩及女婿東興錶行董事總經理Jeffrey黃成藝齊齊撐場。
Sarah啱啱坐滿月，氣色好好，佢已有一名三歲囡囡，加埋啱啱出世嘅細仔，啱啱湊個好字。佢老公Jeffrey來頭唔細，係「深圳王」黃楚標嘅哥哥黃順源囝囝，黃順源喺內地投資地產、酒店同旅行社業務，Jeffrey接手東興錶行之後，大力發展分店網絡，現時喺旺區已有三間分店。佢話睇好市道發展，打算今年開多三間分店。
蘇永強（左）打造鐘錶品牌，囡囡蘇漫瑩（中）功不可沒。右為女婿黃成藝。