富貴長者有屋住 貧窮老人誰可憐

錦上添花同雪中送炭，邊樣重要，邊樣要優先做？呢個問題連小學生都識答喇。房屋協會身為法定非牟利機構，獲政府注資參與資助房屋項目，對弱勢社群居然視而不見，扶富不扶貧，簡直不知所謂！

呢嗱，房協計劃推出分別位於北角同天水圍嘅富貴長者屋，入場費郁吓都要三、四百萬，管理費雜費仲要另計，而且只有租住權冇業權。房協話，呢個概念叫「雋逸生活」，係為長者提供優質退休生活喎。

唔使撳計數機都知，有資格入住人士非富則貴。查實呢啲人根本唔使為冇瓦遮頭擔憂，房協提供嘅超豪版長者屋，對佢哋只不過係多個選擇。正如有立法會議員話齋，富貴長者屋唔係急切需要，社會效益備受質疑；更有市民直指房協「嘥政府錢，好似敗家仔」。

房協主席楊家聲出嚟解畫，話計劃唔係地產項目，冇涉及公帑，土地以市價購入，建造同營運費用由房協承擔，「冇可能賺到錢，打和已好高興」。講嚟講去離唔開錢字，如果唔知佢身份，仲以為佢係大地產商嘅代言人添。

叮！家陣唔係市民上綱上線，而係房協九唔搭八咋。冇錯，唔同階層對房屋有唔同需求，經濟條件好嘅長者希望獲得優質服務亦無可厚非。問題係住宅土地買少見少，必須慎重使用，滿足市民住房需要更要分輕重緩急，先為最有需要嘅無殼蝸牛雪中送炭，而唔係為富貴長者錦上添花。

再講，房協口口聲聲話起富貴長者屋係用自己嘅錢，直頭係噏得出就噏。呢，有人踢爆，房協嘅錢根本唔係佢哋嘅，以往當局用優惠價向房協批地，用來興建居屋及夾屋，房協賺咗錢就入自己袋，呢條數點計先？唔通呢啲錢唔係公帑吖?

其實，家陣房協最需要做嘅，係為基層市民尤其係嗰啲冇人照顧嘅「隱形長者」，以及住喺劏房、板間房甚至籠屋嘅貧困長者解決住屋問題，而唔係一味向錢看，起埋啲租金媲美豪宅嘅富貴長者屋。

房協本末倒置，不務正業，簡直不知所謂，計太一叮話齋，如果佢哋真係無所事事，又想搞搞新意思，不如興建「剩女居」、「宅男苑」吖。不過咁，先要將咁多年來港府嘅資助還畀納稅人，叮！