政壇：立會四懶蛇依然故我
立法會內務委員會聽日開會討論下屆議員大幅加薪一倍至十四萬一千元一事，適逢尋日係討論前嘅最後一次全體大會，公眾都關注議員有冇擺出一副爭取加薪嘅樣，點知議會四大懶蟲依然我行我素，有「三點不露」外號嘅金融界李國寶現身會場一陣，但好快閃人，不過佢就罕有咁以競選辦主席身份，陪同特首參選人唐唐出席中華出入口商會嘅論壇，邊個重要啲，做晒出來啦！
醉心體育工作嘅霍震霆，未知係咪朝早有活動要出席，搞到要延至下晝至喺立法會出現，唔通佢記錯下晝開會？至於「發叔」劉皇發同「IQ博士」黃宜弘就忽然表現積極，不時都喺會議廳同前廳出出入入，但發叔竟然聲稱唔知議員傾緊加薪。IQ博士嘅表現最有性格，被問到加薪一事時，佢面不紅耳不赤咁話，自己唔志在份人工，亦唔會阻住地球轉，大家想點就點喎，一副闊佬懶理嘅款。