政壇：麥記一姐微服做前線
香港麥當勞去年五月有新董事總經理上任，佢就係黎韋詩（Randy），三十九歲就成為香港麥記史上最年輕嘅一姐，真係唔簡單。九三年由加拿大畢業返港後，做過幾間大企業，後尾膽粗粗打電話去麥記搵工，當時正值麥記開拓內地市場，佢就去咗中國麥當勞做市場策劃主任，仕途一直順利，○九年更升為香港麥記副總裁。
當時身為高層嘅Randy由於唔係前線員工出身，所以就接受營運部門培訓，一年內隱瞞高層身份去幾間分店擔任唔同崗位，包括炸薯條、收銀、抹枱、沖咖啡等，有日佢做做吓嘢，就收到通知去新加坡做董事總經理，點知做咗半年又調返香港。
自言細細個已經係麥記粉絲嘅佢話，七五年第一間麥記喺銅鑼灣開幕，佢只係三歲，媽咪經常帶佢去幫襯，仲喺嗰度搞生日會添。
黎韋詩係香港麥當勞歷來最年輕一姐。