政壇：搞搞政：浸大調查辣慶陳茂波

浸大公布咗特首民調早洩嘅調查後，各界批評再升級，會計界立法會議員陳茂波（Paul）尋日都疑似化身會計界「長毛」，喺facebook發炮，話閱報感覺有「三超」，其中一項係指摘浸大嘅調查「超馬虎」，直頭係草草了事；加埋另外兩超，佢真係成個「唔順超」咁噃。

阿Paul批評，新居屋補價方案根本多此一舉，製造咗新舊業主之間嘅矛盾，但當局竟然可以講成係「優化」方案，真係「超廢話」；至於「超擦鞋」，就係有評論文章認為「鬍鬚曾修復力強，預算案漏洞極少」。屬於建制派嘅阿Paul忽然連珠發炮轟政府，有網友就質疑佢係咪「轉咗會」(變反對派)，但阿Paul就強調自己只係實話實說喎。

講開民意調查，新民黨副主席田北辰尋日出席一項活動時都回應到被傳可能出戰立法會超級區議會議席一事，佢話要搵學者做咗民調先，可惜班學者近日忙於做特首選舉調查，冇人理佢，希望可以趕及月底兩會之前完成民調。