政壇：包庇兩電吃惡果 邱騰華嚇到傻

兩間電力公司要求大加電費後，各界嘩然，立法會亦馬上要求當局同兩間電力公司披露加費嘅資料，不過農曆年過去，立法會經濟事務委員會兩度開會都係得個吉。卒之搞到議員喺立法會提動議，研究係咪引用《立法會(權力及特權法)條例》，要求環境局局長出示所有同兩電加電費嘅相關文件，期間議員更指環境局局長邱騰華涉質疑議員能力低「唔識睇」相關文件。議案雖然遭到否決，邱騰華都變咗龍年第一個險被立法會出動尚方寶劍嘅官，呢次真係唔電死都嚇傻！

尋日辯論時，建制同泛民議員都對政府大表不滿，提出修訂動議嘅富貴黨方剛更批評，政府遲遲唔同議會合作：「至上禮拜三仍未能提出議員要求嘅資料，禮拜四至交出資料，政府係咪要咁多時間去跟進啲文件呢？定係殺到埋嚟先至肯做嘢呢﹖」質疑邱騰華用拖字訣賴死。

公文袋另一議員更氣上心頭，指摘邱騰華對待議員要求公布資料嘅態度係「畀你都唔識睇」，因而一直採抗拒態度，呢個涉及質疑議員能力嘅說法，嚇到邱騰華即刻澄清，聲言已盡量配合議員取得所需資料。

建仔被轟態度大變

議員尋日辯論時，都大翻高官舊帳，直指今時今日港人被大加電費嘅原因係利潤保證，「可能係我哋負責談判嘅政府官員從未營商過，唔知道賺錢幾辛苦，佢哋習慣呢個基金就批兩億，嗰個基金又批十億﹗」

邱騰華一味捱鬧，不過，尋日嘅會都有建仔陪佢，事關泛民政黨批評建仔喺事件中態度大變，直頭係「小罵大幫忙」。