見錢開眼自駕遊 中港矛盾勢升溫

港府冇嘢叻，最叻好心做壞事，尤其係盲舂舂做大壞事，簡直叻到冇朋友。嗱，懵炳官員推行靠害政策嘅例子實在多不勝數，所以太一叮今日只係講一個最新例子啫，就係全城鬧爆嘅粵港「自駕遊」大計！

顧名思義，粵港自駕遊即係兩地過境私家車一次性特別配額，首階段先容許港人北上，隨後允許內地同胞駕車來港自由行。本來呢，內地客係本港旅遊業嘅大水喉，呢個自由行擴充版無疑係一條加快「北水南調」嘅吸財妙方。於是咯喎，見錢開眼嘅港產官僚就好似執到寶咁，全速落實喺下個月試行嘞。

自駕遊係旅業水喉，點解港人要求煞停之聲一浪接一浪呢？唔通嫌錢腥？理由好簡單，因為香港為內地車大開城門，弊端同港府嘅劣政一樣，都係數到天光都數唔晒。好似內地「烏賊」通街噴黑煙啦、雙非孕婦以後長驅直入本港急症室啦、內地車喺香港犯規輕易逃之夭夭啦。之不過咁，講到港人對自駕遊敬而遠之，最主要嘅原因都係：港人如果要賺呢筆錢，簡直係搵命博，隨時有錢都冇命享！

咁講唔係誇張o架，先唔講神州司機揸車當舞龍呢種文化差異吖，正如本港汽車業人士話齋，內地嘅汽車、交通法例、路標設計都同香港嘅相差十萬八千里，唔熟路嘅內地司機當香港係練車場，簡直就係一個個馬路炸彈！

最攞命嘅係，「我爸是李剛」嘅嚇人新聞名震中外，一旦香港成為內地官二代、富二代嘅亡命賽車場，撞死人之後又恃住老竇做官欺凌苦主，港人唔通去中聯辦討公道咩？各位港產官僚，香港已經又冧樓、又冧樹、又冧簷篷，危機四伏，如果行街都要擔驚受怕，唔使等唐英年入主禮賓府，香港可能已經出現移民潮咯！

好心港府咪咁腦殘啦，撇開道路安全問題，其實家陣都唔係實施自駕遊嘅合適時間。喂，中港矛盾持續升溫，萬一有冷血內地司機喺香港撞親人，莫講話做出擔心傷者唔死、揸車褪後轆多幾轆嘅禽獸行為吖，就算只係同傷者或路人口角爭執，都隨時為中港矛盾火上加油，引爆新一輪罵戰，到時港府盞捉蟲咋！

一句講晒，自駕遊自製炸彈，笨官僚添煩添亂，如果港府仲唔重新評估，真係車毀人亡都有之，叮！