政壇：搞搞政：林公公炮製政助怪胎招怨

早幾年政府擴大政治問責制時，引入被嘲為政治「怪胎」嘅副局長同政治助理，就連政制及內地事務局局長譚志源早排都話班政助有減薪嘅空間，即係間接話政治助理浪費公帑，令班經常被批評到體無完膚嘅政助更加意興闌珊。

有部分政助就四出訴苦，話佢哋喺政府架構裏面其實好尷尬，喺班公務員眼中，佢哋係怪物，一直都夾唔嚟。由於定位不清，政助之中有人做到分身不暇，亦有人被投閒置散。

再講，呢班政助合約完咗仲要過冷河一年，變相八折支薪，所以話佢哋入政府其實都未必為咗賺錢，依家仲要減人工咁坎坷，相信依家冇邊個想留低。

正所謂食得鹹魚抵得渴，怪就怪呢個制度嘅設計師，即係譚志源嘅「恩公」，前局長、現任政務司司長「林公公」林瑞麟，冇諗清楚就搞咗個「怪胎」出嚟，搞到市民話班政助嘥錢，佢哋又發揮唔到自己嘅專長。