政壇：貪威認叻煲呔曾爭亮相

煲呔曾領導嘅夕陽政府做乜都唔掂，唯獨沽名釣譽就最耍家，所有可以認叻嘅地方都可以見到佢。好似尋日一年一度嘅馬拉松活動咁，煲呔曾一如既往獲邀擔任起步禮主禮，事後仲即時將現場影嘅相貼上特首辦個facebook專頁。唔少網友睇唔過眼，狂插佢，仲留言諷刺佢咁得閒，不如盡力解決雙非來港產子問題好過。

網友Jony Ho就話：「曾蔭權真係得閒，有時間幫私人機構活動做嘉賓，冇時候處理雙非問題。」Nanako Cheung：「雙非闖關衝急症室每分每秒舉行，起步禮由特區政府唔做好呢份工開始，有助吸引更多遊客到訪。」網友Dicky Wong一語中的點出煲呔曾嘅荒謬：「特狗政府搞嘅『全天候無差別雙非搶閘衝關自由任我行——活動』咪仲盛大，仲踴躍!?趁未換屆，煲呔去邊境關卡、醫院急症室主持起步禮啦，大把雙非大肚婆等住參加！」

跑手猝死 特首辦無反應

班網民都係點醒煲呔曾咪掛住認叻，花多啲時間去做好自己份工；但諗深一層，都係網友Petpet Ranger講得好：「都末期癌症病政府，仲有乜作為吖？」Keith Lau亦附和：「呢個咁嘅政府，面皮都真係厚得過分，叫人唔好停步，但香港依家已經退晒步了。」好心煲呔曾就聽吓呢啲民意喇！

好似尋日參加馬拉松嘅跑手猝死，點計煲呔曾都應該慰問下，但直到尋晚，仍然唔見特首辦個facebook有乜表示，只係喺度吹噓同推銷自己，市民梗係對佢死心喇！