纜車遲來換啤令 管理粗疏要換人

昂坪纜車又停駛？唔好嚇太一叮呀，八百名遊客年初三被困「冰廂」半天吊，啱啱停駛咗十日，已經成為國際醜聞，咁快又跪低，香港旅遊業塊招牌真係拆得o架嘞！

其實，今次停駛皆因上次事故引起，纜車公司調查後發現啤令不規則磨損，被迫停駛兩個月，全面更換七組啤令。你知啦，纜車事故爆不停，家陣終於肯全面執漏，雖然係遲來嘅補鑊，不過遲到總好過冇到吖！

咦咦咦，咪住先，纜車公司認衰補鑊，全面更換啤令，遊客係咪就可以從此安心，搭纜車唔使帶定驚風散呢？咁又未必！太一叮淨係講一件事啫。年初三纜車死火，死因係其中一組啤令出事，家陣全面更換係補鑊基本動作，但亦同時揭發一個驚人秘密，原來纜車開幕六年，從來都無換過啤令，問你怕未！

正如工程界人士指出，啤令屬「粗用」零件，一般壽命為五年，纜車公司六年無換過，到底係管理粗疏吖，定係得過且過，當睇唔到呀？還是抱住僥倖心態，諗住用過期啤令唔會出事？嗱，纜車公司算行運嘞，纜車「赤口」停駛，最多被遊客鬧到狗血淋頭，萬一搞出人命傷亡，走佬都唔掂呀！

咪怪太一叮多心，纜車管理吊吊揈，已經成為昂坪360最深入民心嘅企業形象，今次被迫更換啤令，難保唔會又係得過且過、敷衍塞責。兩個月後重開嘅纜車，會唔會又失驚無神向遊客附送半天吊驚險歷程？真係無人講得埋！

話時話，昂坪纜車當年由吊吊揈嘅唐英年主禮開幕，唔通真係中咗詛咒？纜車管理一條龍吊吊揈，纜車公司唔在講，港鐵又係一擔擔，連港府都唔嗲唔吊，關人個關。前排之嘛，海洋公園同迪士尼樂園嘅機動遊戲亦雙雙出現故障，新年流流搞到大批遊客焗住吊吊揈。港府再唔睇實啲，香港塊旅遊業招牌肯定好快保唔住嘅咋！

即係咁，纜車事故頻生，管理層難辭其咎。港府如果發現佢哋唔稱職咯喎，咪好似換啤令咁全面更換囉，無謂畀一個管理吊吊揈嘅纜車公司搞到香港旅業半天吊吖，叮！