龍年新正頭首次開嘅銀公會議，大家都有啲期望，點知銀公主席Anita馮婉眉冇出席。不過，佢亦好識做，預先吩咐公關姐姐派利是，莫非唔想大家空手而回，其實有冇利是都冇所謂，最緊要係Anita趁例會，update吓銀行界嘅發展啫。
盡責嘅公關姐姐講到明，啲利是係馮小姐派o架，今年嘅利是，同舊年中銀香港行政總裁和廣北做銀公主席時一樣，都係五十蚊。連Anita嘅下屬，銀公署理主席梁兆基一出嚟，就問「大家都收咗利是囉呵？」果然係責任重大。
新正頭第一次開嘅銀公會議，馮婉眉雖然冇出席，但照樣大派利是，果然識做！（資料圖片）
