政壇：政商定格：小吉30年不變轟稅制無改
全國政協委員方「小吉」駐顏有術。早幾日有電視台為咗呼應新一份嘅財政預算案，搵番一九七九年訪問嘅小吉講稅制改革嘅片段，當時佢戴住大眼鏡，留一把長長嘅直髮，銜頭係稅務會計師。
話說喺前晚一個新春酒會，葵青區議會主席方平同小吉打招呼，問小吉有冇睇到自己三十幾年前接受訪問嗰段片，仲猛讚小吉美艷如昔，睇落仲好似後生過以前咁，小吉即時展現甜絲絲嘅笑容，仲話好多朋友都睇到段片。
但講起訪問內容，小吉就有啲嬲嬲哋，話短片已超過三十年，佢當年建議政府容許市民將購買醫療保險及退休金供款列入扣稅項目，但呢啲可以拉近貧富懸殊嘅稅務改革建議，至今仍未被採納，到依家都仲係咁喎！
