政壇：譚志源訪台迷路唔老利
政制及內地事務局前局長林瑞麟年前訪問台灣，畀當地傳媒大玩佢嘅「人肉錄音機」外號，失禮港人。接佢手嘅譚志源近日就首次以局長身份率團訪台，又再爆出笑話。
話說譚志源一行人前日喺台北坐車到陸委會進行拜訪時，一度走錯路不知身在何方，最後要向陸委會接待官員求救，透過手機實時教路先至搵啱地方。認真唔好腳頭，希望由佢負責港台關係嘅未來發展唔會迷路啦！
譚志源尋日轉抵台中，出席「2012中台灣元宵燈會」開幕，並為香港旅遊發展局籌辦嘅香港燈區主持點燈儀式。就喺臨點燈前，同台嘅台中市長胡志強忽然大喊一聲：「等一吓！」原來佢係想叫埋譚志源嘅太太一齊上台點燈，認真有紳士風度同識得做騷，我哋班特區高官真係要學吓嘢啦。
胡志強（左）話睇佢同譚志源（右）兩個，就知台中市同香港有幾相似，莫非佢想話大家都係戴眼鏡同「地中海」？