政壇：煲呔曾腦退化辣慶哪吒

話說早幾日喺民政事務局新春團拜上，煲呔曾照舊逐一同班區議員握手，當握到去西貢區區議員「哪吒」方國珊嗰陣，煲呔曾講唔出哪吒個名，要睇哪吒身上嘅名牌後，先至恍然大悟話：「啊，你係方國珊，久仰大名！」哪吒聽到後，當堂（火羅）爆。

○七年煲呔曾競選連任時，哪吒係助選團成員之一，煲呔曾有幾場宣傳活動都有叫佢幫手。到○八年，西貢蠔涌灣發生嚴重車禍，煲呔曾同哪吒等地區人士都有到現場視察，當時哪吒仲企喺煲呔曾後面添！

如果咁都唔認得，一係煲呔曾白鴿眼唔放哪吒在眼內，利用完人就即刻變臉扮唔識人；一係煲呔曾個腦退化得好犀利，竟然喺短短三、四年嘅事，都忘記得一乾二淨，可能過多幾年，佢連自己做過特首為禍港人都唔記得。

講起哪吒，大家都知道佢大力反對將軍澳堆填區擴建，最近佢就分別去信兩位特首參選人CY梁振英同唐唐，希望佢哋表明立場，幫手反對擴建。CY好快就回覆，支持反對擴建堆填區，但唐唐就連影都冇。