政壇：高官最叻做小學雞

立法會新大樓尋日擺入伙酒兼春茗，請高官同議員食晏，財爺鬍鬚曾都有到，但就一直匿喺宴會廳嘅角落，連「潮州怒漢」詹培忠叫佢行前啲畀傳媒影吓相都唔肯。

鬍鬚曾嘅「大佬」煲呔曾亦一擔擔，開飯前龜縮喺宴會廳一角，慌死畀人見到咁款。

開席前主席先同眾人拜年，祝大家「飛龍在天」，之後隨即為遊戲揭開序幕，佢寸盡官員同議員話要搵一個政治正確、適合喺立法會玩、仲要「同官員、議員嘅智慧、生態相稱」嘅遊戲確實唔易，結果搵到立法會兒童天地畀幼稚園學生玩嘅拼圖遊戲啱使，將之改良畀大家玩。

白鴿三子死撐讓賽

主席同煲呔曾互相抽出官員隊同議員隊嘅成員，最終抽中三位白鴿黨議員，官員隊就有金管局總裁「攞命陳」陳德霖、行政會議成員查史美倫同運輸及房屋局常秘栢志高。

拼圖遊戲除咗要砌番出一幅社區面貌嘅圖畫外，仲要標示番圖中嘅違法行為，理論上，議員成日鬧爆班官短視，查找不足，白鴿黨三子應佔盡優勢。點知實際上兩分半鐘之後，官員隊宣告完成，三子依然喺度左度右度，台下嘅立法會主席都忍唔住話三子「咁屎」。

竟然喺主場輸波，三子攞紀念品時即時畀人勁噓。其中肥仔明死撐話平時官員上立會都戰戰兢兢，呢次佢哋只係讓賽，等官員威番次，平衡一吓佢哋嘅心理。

唉！咁失威，仲撐乜嘢吖。立法會主席就幫議員幫到盡，跌咗落地都（手拿）番揸沙咁話，咁就證明官員做幼兒嘢比議員稱職。換言之，班官玩小學雞遊戲至叻，而班議員呢？大家都諗到喇！