打壓新聞自由 港府自毀根基

夕陽政府吹水唔抹嘴，話會為市民嘅幸福奮鬥到最後一分一秒。實情係點？捍衞市民幸福係假，破壞市民幸福至真。嗱，打壓傳媒，封鎖新聞自由，夕陽政府確實係奮鬥到最後一分一秒o架。

呢，繼警方通訊系統數碼化，消防處亦照辦煮碗，尋日起全面停用俗稱「聽機」嘅模擬制式無線電通訊系統。日後傳媒再唔可以透過原有系統知道火警、人命傷亡等重大事故消息，只能靠官方篩選發布嘅消息，恩賜幾多得幾多。消防處講到明，唔會發布個別人士嘅救護召喚。

叮，消防處嘅職責係滅火救人，唔係作新聞吖！由佢哋越俎代庖替傳媒決定邊一單有新聞價值，後果可能好嚴重。

舉個例，鴨脷洲街市早前發生強姦案，受害少女事後送院檢驗，喺當局眼中，可能只係「個別人士嘅救護召喚」嘅小畸士，毋須通知傳媒。但事實上，呢單案件係大新聞，如果唔及時公諸於眾，市民蒙在鼓裏，咪隨時再發生風化案？

所以話啫，扼殺新聞自由即係扼殺公眾知情權，即係摧毀香港核心價值。正如有人話齋，香港陷入資訊封鎖嘅黑暗時期。

點解曾蔭權政府咁害怕新聞自由？無他嘅，施政無能，醜聞多多，咪驚傳媒踢爆囉。立法會議員講得啱，曾蔭權多次被傳媒揭露衰嘢，所以敵視傳媒。車公靈籤都話喇，「神鬼如何兩不分」，夕陽政府施政混亂，心中有鬼，惟有不斷打壓新聞自由。由設立所謂核心保安區到一再隱瞞嚴重罪案，由警務處處長曾偉雄嘅黑影論到前政務司司長唐英年批評傳媒完全係垃圾……港府與傳媒為敵，令新聞自由逐漸消失。

嗱嗱嗱，港府打壓新聞自由唔單止喺本港引起怨聲載道，仲搞到臭名遠揚添。「無國界記者」早前公布二○一一至一二年度全球新聞自由指數排名，香港急跌二十位至第五十四位，慘不忍睹。香港新聞自由指數愈來愈向內地靠近，反映港府內地化，警隊公安化，新聞和諧化，再咁落去，「一國兩制」遲早變成「一國一制」嘅咋，叮！