SUN微博：賣國樂園

填詞：浩賢（CASH） 原曲：世界真細小

無厘頭玩寸，錢佢照樣袋。

無厘頭搞亂，確實係無聊。

賣國唔怕死，因為有獎，　到人仔不得了。

句句公理，假假假！

滿腦歪理，真卑鄙！

落力搞亂個政界，反港如做戲。

無厘頭開戲，囂張冇避忌。

無厘頭北望，確實係離奇。

扮晒紅衞兵，搞亂法紀，皆因人仔冚天理。

句句公義，假君子。

滿肚蠱惑，想　銀。

事實搞亂了政界，奸商財路近。

打橫嚟講

彭志銘 次文化考古學家，對城中潮語有深入研究，博徵博引，廢官廢人行埋一邊。

聾的傳人

「雙非」孕婦拚死闖港生仔，誘發的問題愈來愈大鑊，不僅友鄰和睦咁簡單，已到族群衝突臨界點。坊間聲音，上由學者專家，下至平民百姓，無不催促曾蔭權政府出招撲火，就算修改《基本法》或尋求人大釋法也好，都望呢個等收工的夕陽政府，臨起錨收皮前做番單好事，咪留下個隨時炸死人嘅真菠蘿喺度。救救我們下一代吧！

點知，煲呔hea住咁丟低那不中用的廢柴四招後，便當處理咗，反而全心全意去祈禱，望在任時，見歐債冧檔，心腸歹毒！幸好，全國人大常委范徐麗泰出來指證，根本毋須修改《基本法》或釋法，當年《基本法》籌委會的「立法原意」早已否定「雙非嬰兒」，兼不獲居港權的了，只是時任政務司長曾蔭權一直翹埋手唔做嘢，才弄至今日一鑊粥。

記者就范太有關言論查根究柢去，詢問各政府部門，縱使眾人諸多玩嘢，甚至保安局轉介記者去問其他部門咁荒謬反智，但總算有反應，但煲呔面對面卻做咗「聾的傳人」，充耳不聞，聽唔到。佢放任大陸婦南來生仔，中間唔通有不可告人之秘密？難道佢有個小三坐緊大飛落嚟……？

遊行篤數學

在煲呔曾的夕陽政府弱雞施政下，遊行上街無日無之，一如既往，這回主辦單位宣布話人數有50萬，警方話只得20萬，煲呔曾找來禿鷹一哥追問實數。

禿鷹：「遊行嘅人，無花無假真係得20萬咁大把！」

煲呔曾：「你咪當我老襯，我親自逐個數過，確係有50萬人喎，一個都無多無少！」

禿鷹眼仔睩睩，成頭大汗話：「無花無假！當中一萬個係警察，一萬人係記者，一萬人係睇熱鬧嘅自由神，仲有10萬人係工會動員上街慶祝嘅，加埋真真正正上街遊行抗議嘅，確實得20萬咋！」

我的願望

有一日，鬍鬚曾唔小心掉到水溝裏。恰好有三個小孩經過，鬍鬚曾半死不活咁對他們說：「如果你們救我起來，我就給你們每人實現一個願望。」

第一個小孩就說他想要一部iPhone 4s，鬍鬚曾話十部都無問題。

第二個小孩聽到，有啲狡猾咁話想要一層樓，鬍鬚曾自身難保，為咗執番條命，無奈要忍痛答應。

第三個小孩想咗好耐後，結結巴巴話：「我想要一張輪椅。」

鬍鬚曾心裏覺得很奇怪，問：「你手腳好好的為甚麼需要輪椅呢？」

第三個小孩就話：「如果畀我爸爸知道我救咗你，一定打斷我隻腳！」

鬍鬚曾臨收工公布財政預算案，全城鬧爆。各位巴打網民有乜嘢要爆，即管email或上微博小店發表睇法。

Facebook：sunweibo_2012@hotmail.com

微博：Sun微博小店