政壇：政商定格：宋鴻兵出Game玩歐債危機

聽講內地炙手可熱、憑一系列《貨幣戰爭》著作而聲名大噪嘅經濟學者宋鴻兵，打算推出同名嘅Online Game，等讀者可以變身玩家參與遊戲，原來係真o架！

畀人封咗做「財經陰謀大師」嘅宋鴻兵，懶理人哋點嗌佢，佢家陣忙住做《貨幣戰爭》嘅電子遊戲測試。一切順利嘅話，最快四、五月會率先喺內地推出，然後陸續會喺台灣、香港、日本同韓國等亞洲地區登場。宋大師話遊戲嘅第一集，係以歐洲拿破崙戰爭做背景，第二集就以美國崛起為主軸，到第三、第四集仲有亞洲金融風暴同歐債危機，全部係以佢套書嘅背景做遊戲骨幹。

玩家可以同時兼演多個角色，參戰又好、經營都好，仲可以扮埋銀行家，總之就係要「達成任務」。呢套遊戲主旨係畀玩家了解金融、政治喺戰爭裏面嘅相互關係，仲可以從歷史事件中領會自己點樣左右戰爭。