政壇：九巴金公主有個Mr.Right
智經研究中心日前搞新春團拜，見到身兼智經理事嘅「九巴金公主」Winnie伍穎梅，於是追問佢幾時同中建企業董事男友許晉平拉埋天窗、明年係咪有機會派利是？點知佢例牌甜笑唔答，話到時一定通知記者喎！
同場嘅智經主席胡定旭聽到記者同Winnie嘅對話後，就幫口解圍，話想派利是幾時都派得喎，只要開心就得喇！不過，話口未完，佢就爆料話Winnie睇得男友好實，有次佢想同許生飲酒，許生要用眼神同Winnie交流，得到批准後至飲得。
當日馬會大董李國棟醫生都在場，佢都係智經理事之一。Winnie話，李醫生經常帶隊捐窿捐罅去搵好嘢食，確係識飲識食，但李醫生就笑自己貪飲貪食至真。
胡定旭（右）爆料話伍穎梅（中）治到男友好聽話。左為李國棟醫生。