政壇：陳碧鏵改名過檔恒隆
早喺三個月前，有讀者爆料話八達通前行政總裁陳碧鏵，未坐暖無綫電視國際業務總經理個位，又密謀過檔恒隆地產，原來消息確係堅料，女主角喺舊年十二月初返工，出任恒隆地產租務及銷售董事。
喺恒隆地產最新一期刊物《連繫恒隆》中，發現久未露面嘅佢。事緣上月初，佢同恒隆董事總經理陳南祿齊現身集團位於西九龍嘅碧海藍天商場，參加JUSCO百貨店開幕儀式。
原來佢仲改埋名，將「鏵」字改做「華」，唔知係咪個「鏵」字啲金多得滯帶來麻煩，所以刪掉期求浴火重生呢？恒隆嘅公關姐姐話人事部嘅資料顯示「陳碧華」個寫法冇錯，至於點解，佢就話唔知喎！
陳碧華（右三）同陳南祿（左三）一齊出席開幕禮。（《連繫恒隆》圖片）