政壇：工專聯又演貌合神離

工商專業聯盟一直被指面和心不和，尋日喺財爺鬍鬚曾公布任內最後一份預算案後，佢哋終於坐埋一齊開記者會，本來算係團結嘅第一步，點知又將矛盾枱面化。

集富貴黨、經濟動力、專業會議同中總黃宜弘等十二名立法會議員嘅工專聯，難得成班人開記者會，大家已經好期待佢哋嘅立場，究竟係保皇吖、扮中立抑或係做反對角色呢？點知等極都未齊人，劉皇發遲遲未現身，結果十一人焗住開記招先。

富貴黨有嘢等陣講

少一個都唔係乜嘢大問題，最大問題都係內容方面，好似專業會議「鼠王芬」梁美芬咁就大鑊嘞，佢一開波唔係提工專聯，而係話「西九新動力」成功爭取重建兩間醫院。係人都知佢係西九新動力話事人，但竟然喺工專聯嘅平台上幫自己領功，究竟佢知唔知用緊乜嘢身份去講嘢？

除鼠王芬外，富貴黨主席劉健儀好早講明，陣間富貴黨會再開記者會。在場記者即刻爆頭，點解有嘢唔即時講，要等多陣講多次呢？原來富貴黨覺得有啲立場同經濟動力唔同，費時同場但唔同意見喎。

經濟動力對今次預算案絕對係舉腳贊成，讚到天上有地下無，但富貴黨就覺得雖然惠及中產，但對援助基層方面仍然係杯水車薪。咁又好難同場講嘅。

其實，工專聯成立時，大家都估到佢哋冇可能完全立場一致，但估唔到咁耐都磨合唔到，仲係貌合神離。嗱！呢次鼠王芬同劉健儀擺明係唔睇工專聯台戲，唔知身兼工專聯召集人、經濟動力核心嘅林健鋒有乜感覺呢？有冇諗過勉強冇幸福？