斬人血案添悲劇 涼薄政府埋禍根

又發生斬人血案，真係令人震慄！而最令人痛心嘅係，喺香港，類似慘劇幾乎從未停過，鑊鑊新鮮鑊鑊甘。

最新慘案發生喺上水彩園邨，一名保安員懷疑被精神病患者襲擊，雖然保安員奮力反抗，最終仍然死於亂刀之下。

新春佳節啱啱過去，屋邨鮮血四濺，見者落淚，聞者傷心。呢宗血案點解會發生呢？現場消息指，疑兇與死者並無仇怨，不過，有人曾接受精神科門診服務，過去兩年有六宗家庭暴力紀錄。換句話講，疑兇病情惡化有迹可尋，問題係幾時爆發嘅啫。

嗱嗱嗱，兩年前葵盛邨亦發生精神病人追斬居民慘劇，導致兩死三傷，震驚全港。當時港府點講㗎？佢哋建議推行社區治療令，規定嚴重精神病康復者要定時覆診。但係點解法例至今影都無呢？

大家應該仲記得，○九年亦有一名精神病患者當街斬死小朋友，再之前就有精神病人掟仔女落街。當時當局誓神劈願話會加強支援精神病康復者，防止類似慘劇重演，可惜次次講完之後，斬人慘劇依然不斷發生，究竟點解？

理由好簡單，就係當局有病！港府高官個個高薪厚職腦滿腸肥，但係投放支援精神病患者嘅資源就少得可憐，精神病科床位不足，醫護人手短缺，精神病患者根本無法得到應有診治同照顧，社會埋下危機，何足為奇？

特別係近年，當局為咗諗縮數，推行所謂「融入社區」政策，美其名讓精神病人融入社區，但係又無足夠配套支援，連康復病人覆診都要排長龍，更加無足夠社工跟進，咁同靠害病人同市民無乜分別嘅咋！

講起融入社區，煲呔曾嘅施政報告曾經提出，喺十八區設立精神健康綜合社區中心，以加強支援精神病人，但當局以地區反對為理由，拖拖拉拉，拖到依家仲有一半中心搵唔到會址，部分只得辦公室，甚至借庇護工場濫竽充數，想唔出事都幾難！

港府無靈魂，醫管局有病，唔怪得悲劇不斷喇。學者估計，今次發生慘劇後，精神病人融入社會將更加困難。唉，好心各位高官，痛改前非又好，當積陰德又好，認認真真諗辦法拆彈啦，如果佢哋仲係諗唔通，咁就速速睇醫生啦唔該，叮！