政壇：中大團拜勸捐每人一千
中文大學校長沈祖堯尋日率領眾副校長、學院院長喺校內文化展覽館同傳媒拜年，個個都着上唐裝衫應節，仲一人掏出一封大利是，以為係派畀記者啦，原來係表錯情。
沈祖堯話政府人人派錢六千元，認為中大上下應該好好利用呢筆錢，所以就發起「中大人．愛中大．萬眾一千」活動，呼籲師生捐出其中一千元畀中大I-Care學生服務計劃，協助推行學生輔導同義務服務。身為中大高層，梗係要身先士卒啦，各位副校長、院長個個乖乖地奉上大利是。
佢仲出心出力氹學生，唔單止即席揮毫寫揮春送畀學生，仲落手落腳教學生寫大字，唔少國際學生見到呢個中國傳統，都主動走埋去學番兩招，同校長打成一片。
沈祖堯（右二）同一眾副校長、院長人人捐出一千元。