政壇：盧文端遺忘自己係建仔
建仔嘅監委會副主席、特首政協界別選委「票王」盧文端尋日話，佢已經決定咗會提名唐唐，仲連提名表格都簽埋添！咦，建仔唔係星期五先開會商量提名意向咩，點解佢可以搶閘表態？
點知佢就反問：「係咩？我係建仔呀？哎呀……監委咪即係茄喱啡！」佢話只知自己係福建社團永遠名譽會長，又話成日唔覺得自己係建仔。佢仲話提名唐唐都係因為聽完契女伏明霞嘅老公、前財爺梁錦松嘅游說同分析，覺得好有道理喎。
阿松講完之後，盧文端就被女婿、廠商會副會長吳永嘉要求佢幫唐唐簽提名表格，但佢一時唔記得自己係建仔領導層，咁就簽咗喇。就連建仔陳克勤都聽到一頭霧水，質疑盧文端冇理由唔記得自己係建仔，叫記者問清楚盧喎！連自己人都咁講，盧文端真係要再向建仔解釋吓至得嘞。