政壇：阿王九月焗選港島區
早前都講過，福建幫喺嚟緊九月立法會選舉唔再幫人抬轎，積極準備派員爭奪港島區議席，甚至連同鄉、民政事務局副局長許曉暉都成為考慮之列，令轉戰港島區嘅工聯會王國興面臨硬仗。阿王尋日同拍檔潘佩璆向傳媒拜年，順便推銷工作報告，點知份報告發現阿王嘅身世之謎，原來佢都係福建人。外界傳佢焗住選港島區，就更加似層層嘞！
工聯會今年準備行「風車」戰陣似乎已成既定事實，阿王仲怕醜話參選去向尚待工聯會拍板，但佢亦不諱言自己喺港島區嘅人事、網絡、朋友都較熟，尤其係同福建幫亦早有淵源，事關佢係福建漳州人，反而潘佩璆只能算係半個福建人。究竟福建幫受唔受阿王呢套，大家要拭目以待喇。話時話，阿王尋日心情勁靚，莫非福建幫已首肯讓路畀佢？
設計圖片