政壇：蘇錦樑亂噏又出醜

為慶祝今年奪得亞太廣播聯盟機械人大賽嘅主辦權，港台尋日趁團拜特登喺美國搵嚟一個昂藏七尺、活動自如嘅機械人載歌載舞助興，就連主禮點睛環節都要透過遙控飛碟操控，咁高科技，唔知係咪為咗配合數碼聲音廣播呢？

「空降」嘅廣播處長鄧忍光都好有氣勢咁由舞台高處嘅秘密通道走出嚟，但另一位主禮嘉賓，經濟發展局局長蘇錦樑喺致辭時好似有啲呷醋咁話，雖然佢同鄧忍光都係首次主持團拜，但係待遇明顯不同，笑言新處長嘅進出可能有特別安排，惹來哄堂大笑。不過，唔知係咪寸緊呢啲係鄧忍光「空降」嘅「特別安排」呢？

見到記者想閃人

唔知蘇錦樑係咪搞經濟發展搞到上晒腦，最後仲祝港台以及廣播業界廣告收入創佳績。咦！港台係公共廣播機構，又點會有份收廣告費呢？差啲以為佢又好似鄧忍光咁，分唔清港台同商台嘅節目添！如果係嘅話，咁就真係抵打嘞！

跟住佢又話，嚟緊廣播界將會百花齊放，又會有好多新成員加入，但到活動之後記者問起免費電視台牌照嘅審批情況時，佢就話一切都會「有序咁根據程序處理」，始終都講唔到實際時間。

雖然鄧忍光好威風咁出場，但落返台下，記者點都搵唔到佢企定定接受訪問。最初記者叫佢講兩句時，佢只係笑而不答，幾經要求後，佢終於肯走到傳媒採訪區，但派完一輪利是後，就即刻諗住閃人。當記者再三催四請，佢先勉強講咗句「祝大家身體健康、龍馬精神」。

聽講港台傳統開工利是係兩蚊，今年加碼到十蚊，就連港台節目製作人員工會主席麥麗貞都笑笑口話，今年封利是「擲地無聲」。