趕客醜聞不絕 遲早人財兩空

好客之都變劏客之都,新年流流香港又丟架嘞!再有內地傳媒踢爆本港黑店涉嫌欺客醜聞,認真醜死怪。

橋唔怕舊,最緊要受,今次醜聞又係涉及計價單位做手腳嘅伎倆。話說農曆大年初二,有位深圳旅客喺彌敦道一間藥行被游說購買西洋參同石斛等名貴藥材,店員冇話按乜嘢單位計價,亦冇講金額,拿拿臨將藥材切磨包好,埋單合共港幣一萬七千幾蚊。

點解咁貴?藥行話係按「香港計價單位」收錢喎。但呢位旅客返到深圳後愈諗愈唔對路,上網一查發現至少有十幾個貼子痛斥呢家藥行坑人,翌日要求退貨被拒,惟有報警求助,藥行最後死死氣全額退貨。呢位旅客話,如果當局唔加強監管,制止呢種銷售手法,內地旅客會對香港市場失去信心。

其實,如果港府有心監管,呢位同胞又點會畀人斬到一頸血吖。近年來,類似劏客醜聞幾乎無日無之,都唔知幾多同胞中過招咯。

嗱,消委會舊年接獲三百幾宗參茸海味店不良銷售嘅投訴,比前年大幅增加三成四,八成半投訴來自內地旅客。無良店舖專揀內地客落手,劏客手法大同小異,最常見係混淆計價單位,或者博大霧快快手將貨物磨粉切片,造成既定事實逼客人埋單,又或者趁對方唔留意高速碌卡等。

話時話吖,香港購物天堂早已名不副實,變成購物地獄。立法會議員又好,傳媒又好,早就批評港府喺保障旅客消費方面監管不足,有法不依,執法不力,法例過分寬鬆。可惜當局一直詐傻扮懵,關人個關。

幾年前,央視「放蛇」揭發本港無良店舖劏客黑幕,當局大鑼大鼓「打擊」咗一輪就冇下文,結果黑店好快就死灰復燃,歪風愈吹愈烈,今次如果唔係畀內地傳媒踢爆,當局可能仲喺度發旅遊之都嘅春秋大夢添。

冇錯,內地客源源不絕,香港旅遊業旺丁又旺財,旅客人數幾乎年年創新高。但不可不知,好事不出門,醜事傳千里,任何一單劏客醜聞都可能重創本港旅遊業形象。呢,昂坪纜車啱啱爆大鑊,又輪到迪士尼樂園及海洋公園雙雙出事,想唔趕客都幾難喇,叮!

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!