政壇：搞搞政：單雞怕死唔做官
白鴿黨副主席「單雞」單仲偕同特首參選人唐唐老友鬼鬼，唐唐負責嘅西九文化區董事局，就搵佢入去幫手睇檔，好多人都估計單雞日後可能會做科技局局長。
不過，單雞尋日表明心迹，話做呢啲位分分鐘係白鴿黨死亡之吻，所以唔諗住做，仲話黨主席鐵頭仁已講明，任何白鴿人都唔使旨意做下屆政府內閣。睇嚟單雞都係疊埋心水選立法會，其他嘢真係諗吓好嘞！
單雞分析，三月特首選舉，距離九月立法會選舉只得幾個月，若果有白鴿中人入咗政府做，下屆政府有乜差池，白鴿黨就會自吃苦果，對立法會選舉有好大負面影響。政治一日都嫌長，雖然佢今次立此存照，大家都係放長雙眼睇吓事態嘅發展。
佢仲好坦白話同唐唐的確幾熟，但自從唐唐辭去所有政府職務後，兩人就冇見過面，所以佢絕對唔係唐營中人喎！
設計圖片及對白