政壇：鄉委會杯葛發叔拒團拜

新界鄉議局喺尋日初七舉行團拜，心水清嘅會發覺，出席嘅執委唔多，細問之下，原來多個屬於離島嘅鄉委會主席杯葛團拜，唔睇主席劉皇發台戲。

有消息人士話「冰封三尺，非一日之寒」，離島區議會主席周玉堂早前經協調後順利連任，擊退咗好想做主席嘅委任議員余漢坤，佢事後為保持友好關係，提名余做區會地區設施管理委員會主席，點知後來喺其他鄉紳壓力下，自己又走出嚟同余競選，今次由余擊退咗周玉堂，一眾鄉紳即時拍枱離場，以示不滿。

由於余漢坤係發叔嘅女婿，結果呢單嘢又入晒發叔數，呢股怨氣延伸到尋日。唔止咁呀，早排鄉議局開內部會議討論鄉委會選舉規範化安排，離島鄉紳唔多滿意要受規管，會上極之唔客氣咁力斥發叔嘅得力幫手、鄉議局副主席張學明，免傷和氣，佢只係微笑以對，但對方唔肯罷休，仲大聲話：「你笑咩呀？你唔好笑呀！」