政壇：阿人示威唱《年少無知》
工黨尋日搞遊行，提出對後日財政預算案嘅訴求。遊行原本計劃係一百人左右，點知嚟咗成差唔多三百人，但半數都係外傭，搞到場面好尷尬。班外傭遊行嗰陣猛嗌「加人工、加人工」，完全唔係工黨本身訴求，而啲聲仲蓋過晒工黨主席李卓人等嘅口號，搞到阿人唔知嗌唔嗌好。可能啲外傭見到工黨嘅旗幟，就順理成章諗住一定會幫佢哋爭取加人工喇。
前排電視劇《天與地》紅爆，有人就話戲入面由林保怡飾演嘅鼓佬搞社運，其實係抄阿人嘅身世，阿人雖然話自己冇追開《天與地》，又話冇好似戲中嘅鼓佬咁食人，但佢尋日真係鼓佬上身，拎住張貓紙同黨員張超雄、張國柱送番首片尾曲《年少無知》畀大家咁話！
李卓人（中）拎住貓紙，鼓佬上身咁大唱《年少無知》。