政壇：建仔辣慶鄉紳 新西選情亂龍

建仔相當惹火，踏入龍年繼續燒唔停，先傳出新界東鄉事派唔妥建仔太霸道，尋日仲開會討論派人參選立法會件事，近日又傳出部分新界西鄉紳唔Like建仔，仲搵建仔主席譚耀宗講數添！

傳李國英退黨

先講新界東，除早前講過前沙田區議會主席韋國洪外，近日亦傳出大埔鄉事委員會主席文春輝亦有興趣代表鄉事派參選立法會；江湖仲傳，本身係大埔鄉事委員會副主席嘅建仔立法會前議員李國英有意退黨，瞓身支持鄉事派喺新界東出選，姑勿論傳聞係真係假，都證明建仔得罪嘅鄉事派真係唔少o架。若果李國英真係退黨嘅話，咁建仔肯定火燒後欄嘞！

建仔喺新界西亦唔順利，以元朗十八鄉為例，鄉委會主席梁福元早排喺元朗區議會副主席選舉中失利，大罵建仔出爾反爾，仲話建仔要承擔後果。原來一班十八鄉村代表選舉前曾約見屬建仔嘅區議會主席梁志祥，對方當時答應建仔區議員一定支持梁福元，但到選舉日，所有建仔同親建仔嘅票都走晒，結果咪搞到梁福元落敗囉。

消息話，譚耀宗早排同過幾位元朗村代表會面，會面期間畀班村代表當面斥責，話建仔以前都係靠鄉事派支持先可以壯大，今次出賣梁福元，等同見利忘義，點知譚Sir事後竟然打畀同屬建仔嘅鄉議局副主席張學明投訴受到不禮貌對待，有村代表講明，譚Sir今次咁做等同唔會就梁福元敗選一事交代，佢哋會聯絡唔同政府部門投訴，睇吓有冇人違規、甚至犯法咁話。

講到底，建仔得罪人多、稱呼人少，嚟緊新西想拎三席，似乎真係諗多咗囉！