不求釋法求修法 捨易取難太荒謬

「雙非」問題沒完沒了，相關爭拗無日無之，就算過年嗰幾日，都難得耳根清淨，幾乎日日都有人上街示威，不滿內地孕婦來港產子爭奪資源。唉，冇計喇，港府一味採取拖字訣，遲遲唔肯做嘢，搞到問題不斷惡化，香港有乜可能清淨吖！

呢，尋日又有人上街遊行喇。自由黨發起簽名運動，促請當局考慮透過人大釋法，阻止內地孕婦來港產子。而民主黨就別樹一幟，居然要求修改《基本法》喎。話時話，雙非問題久拖不決，激化中港矛盾，愈來愈多港人感到不耐煩，如果港府再唔諗辦法解決，淨係以不知所謂嘅四招行政措施敷衍了事，遲早爆大鑊嘅咋。

不過咁，問題係要解決，但必須對症下藥，唔可以病急亂投醫。好明顯，民主黨要求修改《基本法》，本末倒置，捨易取難，可以講係屎橋中嘅屎橋。佢哋講得好輕鬆，話修改《基本法》就可以徹底解決居留權問題喎。喂，鬼唔知阿媽係女人咩，問題係，修改《基本法》程序繁複，費時失事，你估好似小學生做功課咁，只要有支塗改液，話改就改吖！

修改《基本法》需要經過乜嘢程序？等太一叮話畀大家知喇。《基本法》第一百五十九條規定，修改議案必須經港區全國人大代表三分之二多數、立法會全體議員三分之二多數以及行政長官同意，然後交由港區人大代表團向全國人大會議提出。即係話，修改議案必須得到以上三方面一致同意，缺少任何一方面都唔得。你話喇，喺香港今時今日嘅政治環境下，有乜可能做得到吖？

講嚟講去，解決雙非問題，行政措施冇用，修改《基本法》費時失事，唯一可行嘅就係釋法，既簡單，又快捷。太一叮諗極都唔明，點解有人偏偏要捨易取難？點解有人對釋法咁抗拒？嗰班大狀話喎，釋法會損害香港法治，影響司法獨立。其實，香港之前已釋過幾次法解決咗唔少問題，又唔見香港法治受損，司法獨立受影響？再講喇，港英時代香港冇終審權，一切由英廷話晒事，當時呢班大狀點解唔話損害香港法治，影響司法獨立呢？

天下本無事，庸人自擾之。香港之所以淪落到咁嘅地步，港府無能固然係主要原因，而無良政客添煩添亂，一樣難辭其咎。無論點都好，雙非問題火燒眼眉，釋法已避無可避，當局繼續猶豫不決，遲早自食苦果，叮！