CULTURE嗡： 80後搵到出路 錢途無限

這次我們找來北上創業的80後阿烽，分享他的創業路。

看似窮途末路，出口卻在轉角。香港近年集中發展金融業等四大產業，令有意於其他行業發展的年輕人苦無出路，而很多80後青年則看準內地發展空間無限，北上創業。經濟學家關焯照認為，內地發展潛力及空間均較香港大，為年輕人提供一展身手的好機會，但愈來愈多80後優質人才外流，勢損香港發展。

阿烽（烽）　關焯照（關）

烽：

細個嗰陣，我已經對美術、設計好有興趣，希望大個可擁有自己品牌。到大學讀設計學系，畢業後，我喺一間禮品公司工作兩年，吸收經驗，及儲錢去建立自己品牌嘅夢想，到一○年創業售賣自己設計嘅衫。開始時，我本來打算將啲衫放喺香港嘅商場寄賣，但傾咗幾間都無下文。後來，同朋友去深圳睇藝術展，誤打誤撞去咗一個創意文化園，嗰度專畀人擺賣佢哋設計嘅產品，租金全免。我就諗，反正香港搵唔到地方，不如就嚟呢度試吓！

關：

近年，愈來愈多80後北上創業，原因有二。首先，香港經濟發展過度集中於金融、商務、物流等行業，其他行業發展空間狹窄，令有意喺其他方向發展嘅年輕人意興闌珊，不得不離港創業。其次是大陸經濟發展潛力大，各行各業潛力無限，為初出茅廬嘅年輕人提供大量發展機會。

烽：

喺文化園擺檔，反應超乎想像咁熱烈，好多人對產品感興趣，覺得好新穎，令我信心大增。而且喺當地擺檔，令我認識到大批來自內地各省市、好有天分嘅設計師，我當時諗，點解唔集結大家力量，吸引更多人注意？於是，我就創立SOMEONE，幾經努力，產品除咗可以喺內地十幾個城市售賣外，喺香港、台灣都有售。

關：

香港年輕人北上發展，擁有一定優勢。首先，香港係國際都市，喺呢度長大嘅年輕人，視野較廣闊，亦接收到較多資訊。另外，香港年輕人以靈活多變見稱，加上英文程度較內地人好，所以喺內地受到歡迎。

烽：

創業初期遇到好多困難，落廠睇貨、搬貨、搵客全部一腳踢。其實，實踐夢想唔係咁易，要建立一個品牌，隨時需要十年、八年，依家有啲成績，希望產品可進軍更多地方令更 多人認識。

關：

愈來愈多香港年輕人北上創業發展，對香港嘅發展有負面影響。由於內地生活成本比香港低，部分往當地發展的年輕人，或會選擇喺當地定居，令香港嘅優質勞動力流失。另外，創意工業新血不斷外流，會令該行業喺香港發展滯後，長遠而言，會步向夕陽，非常可惜。