政壇：搞搞政：橄欖兩年攬兩孫
龍年到，政圈喜事重重。立法會議員陳鑑林（橄欖)，尋日邀請傳媒去佢沙田十二笏村屋大宅拜年，佢同太太新正頭喜氣洋洋，原來佢愛女懷有龍B，預產期喺今年年中，橄欖嘅大仔同新抱舊年一索得男，佢已係爺爺級人馬，依家又將升級做外公，兩年抱兩乖孫，比人哋三年抱兩仲犀利。
畀一萬蚊預訂床位
最近雙非孕婦來港產子問題，令本地婦產科服務出現緊張情況，橄欖屋企都係受害者，事關佢佗咗龍B嘅囡囡要畀一萬蚊先至預訂到床位，比原價貴咗四千蚊，錢銀係次要，不過今次感同身受後，橄欖會唔會喺杜絕雙非孕婦來港產子件事上更落力呢？講開今年新春天氣凍，橄欖深深感受到，因為佢間大宅位處高地，估計最少低一至兩度，就算喺大宅入面開埋暖爐都要着羽絨，有幾凍真係可想而知喇。
設計圖片及對白