政壇：宋祖英表演門券搶手
龍年到，國務院僑務辦公室派出七個藝術團來港表演，呢班猛人包括著名歌唱家、解放軍海軍政治部文工團副團長宋祖英，仲有維吾爾族青年音樂家艾爾肯、藏族青年歌唱家阿旺等，周二（三十一日）演出，港人有機會欣賞到啲高質素嘅視聽娛樂。
宋祖英名頭好響，此番來港都令人關注會唔會重演有歌迷衝上台、摟美要求合照嘅事件？不過，出身解放軍嘅宋祖英見慣大場面，去年中喺河南濮陽市遇到呢種情況就表現鎮定，保持微笑如常唱歌。
其實，國務院僑務辦並非首年舉辦同類活動，自○九年至今，佢哋已累計派出二十個藝術團組，喺全球二十一個國家和港澳地區演出一百三十九場，觀眾人次已經超過一百七十五萬。有份負責籌辦今次活動嘅僑界社團聯會會長余國春估計，晚會將有近萬人入場，入場券已全部免費派晒，依家已經係一票難求！
