政壇：建仔大想頭謀獨霸新西

政黨忙於部署九月立法會選舉，新界西嘅議席由八席加到九席後，各黨都想分一杯羹，民建聯就大想頭到要出三隊人、即三張名單角逐，佢哋過去得罪人多，鄉事派就同佢哋牙齒印極深，建制派自己都爭餐死，泛民又唔會放軟手腳，一場混戰勢難避免。

有建仔中人透露，三隊領軍人物分別係主席譚耀宗、副主席蔣麗芸及荃灣區議員陳恒鑌。至於一直喺新界西選開嘅張學明，有傳話佢未必會參選，所以交棒畀嫡系陳恒鑌。不過，建仔同鄉事派有過節係公開嘅秘密，遠嘅唔講，淨係睇今屆區議會換屆、建仔相當霸道，搶咗好多區議會主席位之餘，就連副主席位都唔留畀鄉事派，好似落選元朗區議會副主席嘅十八鄉鄉委會主席梁福元，事後就表明唔妥佢哋。

如果新界西鄉事派堅決拒幫建仔抬轎，而身兼律師會會長嘅屯門鄉委會主席何君堯又有意循新界西出選，實會分薄建制派嘅票源，建仔嘅如意算盤未必打得響。