政壇：自誇盤數掂 鬍鬚曾唔知醜

倒數任期嘅財政司司長曾俊華（鬍鬚曾），三日後就會發表本屆政府任內最後一份財政預算案，佢有名孤寒財爺，好多市民都唔敢寄厚望，不過鬍鬚曾就一啲唔知醜，早前接受一本月刊訪問暢論歐債危機時，直斥人哋冇財政紀律，甚至為選舉大開能力上限之外嘅空頭支票，卒之將政治問題變為經濟危機。佢呢番說話，既針對兼暗批特首參選人亂開支票，又自誇自讚香港嘅財政好健康，潛台詞咪係話佢管盤數最掂囉！

同特首參選人講風涼話

可惜佢自○七年上任至今，表現評語卻係「乏善可陳」為多，今年政府換屆，鬍鬚曾分分鐘冇得留低，難怪佢喺訪問中講到競選承諾咁句句到肉喇，好似講緊城中爭緊選票嘅特首參選人咁。佢借歐洲好多國家出現財務問題，話呢啲問題係由長期無節制處理公共財政，作出超乎能力嘅承諾所造成，仲話有政客為咗贏得選舉，經常作出超過能力範圍嘅承諾，根本就冇量入為出喎。

佢跟住話，如果政客唔咁做，喺選舉就難以成功，但最終要解決呢個問題，仍要靠審慎理財、重視財政紀律。佢呢番話，真係有啲向落場參選者講風涼話之嫌。

咁都未夠，被問到好多香港年輕人覺得有地產霸權，所以點勤奮都上唔到位，鬍鬚曾又亂噏一通，話自己教西洋劍都要按部就班啦，只要練足基本功，新一代發展不比上一代差，意思係年輕人要按部就班。

總之，鬍鬚曾就係自我感覺良好，以為算盤功係天下第一，完全睇唔到外間多年來對佢做孤寒財爺、漠視民困甚至漠視社會流動停滯不前嘅批評。