新年派無情雞 官僚製造失業

寒天飲冰水，點滴在心頭。正所謂，有人快樂有人愁，呢個十六年來最凍嘅農曆新年，最少有兩批人切身感受到呢種冰寒徹骨嘅感覺。

第一批係被昂坪纜車事故玩殘嘅遊客，被困「冰廂」半天吊兩粒鐘，脫險後連杯熱茶都冇，真係不寒而慄。纜車公司咁樣款客，遊客唔使飲冰水，呢份痛苦經歷都點滴在心頭喇，如果唔係，點會有外國遊客怒吼：「以後都唔會再來香港！」

第二批寒徹心頭嘅人士，就係社署轄下嘅「福利服務助理」。佢哋又發生乜嘢事呢？講起就淒涼咯，新年流流被社署派食無情雞，一過年，就失業，呢份半天吊無着落嘅悲涼感覺，比纜車遊客被困捱凍更加難受。

大家可能會問，社署搞乜鬼呀，新正頭玩炒魷魚，貪利是咩？件事係咁嘅，社署四年前以非公務員合約聘用咗六十幾名福利服務助理，為綜合家庭服務中心提供後勤支援工作，職位只需中三學歷，月薪七千幾蚊，對無一技傍身嘅基層打工仔嚟講，本來係唔錯嘅，甚至可以算係港府近年難得一見嘅德政添。

但好可惜，江山易改，本性難移，特衰政府難得做一次好事，居然有頭冇尾。踏入二○一二年，部分服務助理就陸續收到大信封，指四月約滿後不獲續約，職位將以公務員職位「助理文書主任」代替，理由係檢視後認為服務助理工作有長久需要，應由公務員執行喎。

嗱嗱嗱，呢啲咪叫官僚文化囉！工友做得好地地，社署一聲唔該，話炒魷就炒魷，咁同無良僱主有乜分別吖？社福界立法會議員就講得啱嘞，部分服務助理多年來均獲續約，顯示勝任工作，社署應該考慮以經驗代替學歷，轉以公務員合約聘用。係咯，反正都要請人，做生不如做熟，點解唔考慮聘用原有嘅員工呢？點解係要搞到人哋新年流流失業呢？

講開失業，呢個龍年打工仔都幾濕滯。外圍經濟陰霾滿布，香港肯定無法獨善其身，市場大吹淡風，嗱，獅子銀行早就傳出過年後裁減一千人，即刻引起就業市場大地震。面對咁惡劣嘅環境，打工仔望天打卦，惶惶不可終日，好心港產官僚就唔好再落井下石啦，尤其係社署呀，唔好唔記得你哋嘅職責係扶助弱勢社群，唔係製造弱勢社群呀，叮！