SUN微博
消防新血論 消息防止處理長官（香港）
消防員招聘，主管發現大部分應徵的人都弱不禁風、身材瘦削，覺得十分奇怪，忍不住問：「咦，點解你哋想做消防員嘅？」
眾人答道：「無咩嘅，因為我哋讀新聞系嘅，想貢獻一下香港消防、促進效率啫……」
兩隻蠢豬 長槍鳴（香港）
從前，有三隻小豬，老三起草屋，老二起木屋，老大就起咗間磚屋。有一日，老三間草屋着火，好驚咁去老二度避。上網一睇，消防處無公布，老二即刻鬧老三講大話，仲趕走佢。結果老三就變咗妙齡燒乳豬。
無幾耐，啲火燒到木屋，老二好驚咁去老大度避。上網一睇，新聞處無公布，老大即刻鬧老二講大話，仲趕走佢。結果老二就變咗炭燒黑豚肉。
最後，老大除低個豬頭頭套，露出狼頭，流晒口水咁話：「得豬先會信政府……」
發稿數碼化 發稿中心代言人（香港）
天×邨有一婦人於二十樓單位窗邊企跳，報案中心接報後即聯絡警察、消防。未幾婦人一躍而下身亡，警察消防隨後到場，發現屋內被反鎖，單位內尚有幼子一名，事件交由警察繼續調查。
事後，兩部門各自發新聞稿，分別為「天×邨婦人企跳」及「天×邨幼兒被鎖」，剩下記者一頭霧水。
熄機故事
填詞：浩賢（CASH）
原曲：硬漢子（警察故事）
無自我，硬漢子，有柯打熄機。
常犯錯，做錯咗，冚埋就無事。
搵命當賭注，留下了新聞故事。
公道與天理，全部抹去冇意思。
冚實了，無謂公開畀班記者知。
不內疚，無謂發布缺失獻醜！
無自我，沒法子，聽柯打熄機。
曾立志，做漢子，講完就了事。
公義豁出去，留下了驚人錯事。
公僕冇骨氣，唔願發布似騙子。
冚實了，全部得失只有老頂知。
不內疚，人命哪怕較飛？
冚實了，全部得失只有老天知。
不內疚，人命哪怕較飛？
冚實了，全部得失只有老天知。
不內疚，盲目去熄機—騙子！
Facebook：sunweibo_2012@hotmail.com
微博：Sun微博小店
