政壇：田二少或轉戰超級區會

立法會五個超級區議會議席係兵家必爭之地，據聞由前保安局局長葉劉淑儀領導嘅新民黨睇準時機，心思思想力推該黨副主席田北辰（田二少）披甲上陣，期望喺建制同泛民都想坐二望三嘅空間中攞一席。

超級區議會議席最少要攞到幾十萬票至可以當選，所以政治影響力不容忽視。建制派方面，工聯會副會長陳婉嫻素有「票后」之譽，加上盤據新東多年嘅建仔副主席劉江華，已穩奪兩席；泛民方面，白鴿黨或推一至兩張名單，民協和公文袋各自派出一張名單參選，都吼實兩席，雙方亦力圖第三席。

熟悉選舉嘅政界中人分析，關鍵第三席至今仍冇一方有十足把握，新民黨研判過呢個悶局，有意力推田二少轉戰超級區議會，更有傳聞話，新民黨已成功取得建制派支持，靜靜雞傾掂數。不過，田二少喺新界西耕耘多時，捨直選參加超級區議會，有啲「棄易取難」，所以呢個布局難免仲有變數。