政壇：鄭大班阻議員助理加薪

新正頭好多打工仔都希望龍年可以加薪，一眾立法會議員助理嘅加薪寄望卻落喺鄭海泉做主席嘅議員薪津獨立委員會身上，雖然啲立法會議員一直要求該委員會立即大幅調高議員嘅實報實銷工作津貼，畀啲助理加人工，但委員會就話最快要到下屆立法會至調高津貼，精於數口嘅鄭大班呢次難免畀人睇成加薪攔路虎噃！

立法會議員每月領取嘅工作津貼，唔夠一名局長政治助理月薪高，所以由劉慧卿做主席、負責檢討議員薪津嘅立會小組，早喺兩三年前向政府同獨立委員會反映議員助理待遇差、流失率高嘅問題，要求大幅調高有關工作津貼，並希望喺本立法年度內生效，以便嗰啲已經做咗最少三年嘅議員助理有望喺今屆會期加薪。

不過，獨立委員會早前回信拒絕即時加津貼，理由係向來有關議員薪津嘅調整，都係下一屆會期至生效，免畀人質疑現屆議員「自己決定加自己人工」。

不過，獨立委員會早喺○一年同○六年，就試過喺當屆立會任期中段調高議員工作津貼金額，所以鄭大班領導嘅委員會嘅原因站唔住腳。卿姐於是拿拿聲草擬咗份措詞強硬嘅信件，準備進一步游說鄭大班，為助理加薪博多一次。