政壇：會計師公會爆CEO爭奪戰
踏入龍年，會計師公會密鑼緊鼓招聘下一任行政總裁，事關現任CEO張智媛舊年中已話唔再續約，即係鐵定今年六月約滿離任。據聞，唔少人對呢個位虎視眈眈，當中不乏大家認識嘅名字，預料會有一番惡鬥。
會計師公會早排已開始公開招聘，佢哋同一般半官方或公營機構一樣，將成立遴選委員會挑選合適繼任人，公會期望快啲搵到繼任人，咁樣CEO嘅工作至有望順利交接及過渡。
其實會計師公會CEO呢個位挑戰性好大，尤其政府依家建議加強審計獨立監管，研究係咪需要擴大財匯局權力，會計師公會早前已自動波同意將審核會計師行嘅責任交出，但公會希望保留紀律處分同註冊會計師嘅權力。
