政壇：新界東另起灶 鄉事派撇建仔

九月立法會選舉勢成回歸以嚟最激烈嘅選戰，依家雖然距離選舉仲有半年有多，政治團體喺地區嘅紛爭已進入火紅火綠階段。尋日年初五，沙田鄉委會舉行新年團拜，主席莫錦貴講到明鄉事派喺新界東肯定會派人出選，應驗晒東方報業集團早前嘅報道，更令過去一直受惠於鄉事派抬轎嘅建仔選情更險峻，佢呢頭講完，同樣出席活動嘅建仔葛珮帆同陳克勤嘅反應就耐人尋味，睇嚟鄉事派同建仔喺地區嘅合作分分鐘到此拜拜！

車公籤文中到應

我哋之前講過，前沙田區議會主席韋國洪今年冇做區議員後，有意稍後循新界東地區直選進身立法會。莫錦貴尋日話，韋國洪唔選區議會，對鄉事派係重大損失，仲質疑內裏係咪大有文章。佢透露，今年新界鄉村將會再做一次大型選民登記，希望村民齊齊登記，令新界居民喺選舉發揮更大影響力。

莫錦貴仲話，新界東九個鄉委會已答應聯盟派人選，嚟緊會開會討論細節，新界鄉議局主席劉皇發都答應支持，仲話如果鄉事派真係派人選新界東嘅話，會至少捐出五十萬選舉經費喎。疑似鄉事派參選人韋國洪尋日就笑言，呢一刻的確非常積極考慮出選，但要先衡量勝算同財力，如果得勝率唔高，就唔會披甲上陣。

鄉事派出人，意味佢哋未必會同以前咁拍建仔組成聯合名單，尤其喺僭建風暴刺激下，新界西亦分分鐘效法新界東另組鄉事名單，換言之，鄉事派同建仔嘅合作分分鐘玩完。

直接受事件影響嘅新界東建仔立法會議員克勤仔話，如果建制派有多隊都係好事，又話韋國洪同莫錦貴兩個由細睇到佢大，當佢兩位係師傅喎。疑似參選人葛珮帆就顯得憂心忡忡，好無奈話：「都唔知點算。」

若將此情此景同大年初二車公廟嘅沙田區籤文：「人情反覆似波濤，勿謂金蘭結義高；上古守明金重利，囊空不見舊同袍」比對吓，係咪要講句車公好靈呀！