雙非搶閘出生 港府望天打卦

壬辰龍年，壬辰壬辰，加個「女」字，就變「妊娠」，冥冥中似乎早已注定，今年龍年效應下本港產房勢必生意興隆。

冇錯，產房逼爆深深困擾港人，如果唔係，「雙非」孕婦問題唔會成為中港矛盾嘅導火線。嗱，你話巧合又好，整定又好，本港首個龍寶寶咁啱係一名雙非小龍女，搭正零時零分搶閘出世，跑贏晒本地嘅龍仔龍女。雙非嬰先拔頭籌，唔通今年產房真係淪為雙非天下，本地孕婦一律靠邊站？

即係咁，龍年出世嘅小寶寶係咪特別好命水，不得而知，但首個龍寶寶胎出雙非孕婦，就肯定別具寓意，就係預示龍年效應之下，內地孕婦湧港產子潮勢將更加浩浩蕩蕩，淹沒公私營產房，呢場中港孕婦嘅資源爭奪戰沒完沒了；預示無預約證明書嘅內地大肚婆隨時大軍壓境，胎兒準備搶閘出世，母親準備衝閘喺急症室臨盆。唔止亂象叢生，簡直係險象環生。

話時話，本港第一個龍寶寶非港人所生，而係雙非孕婦所出，其實並唔令人意外。大家知啦，雙非孕婦如決堤之洪水湧港，但係港府束手無策，望天打卦，搞到雙非孕婦淹沒產房。如果港府再吊吊揈，闊佬懶理，莫講今年首個龍寶寶，到咗出年，頭一百個小寶寶都可能係雙非蛇仔蛇女呀！

當然啦，雙非孕婦湧港產子，港人失落龍年第一個B位置事小，港人有B無床位生事大吖嘛。最大鑊嘅係，雙非兒童對香港未來嘅福利、住屋及就業政策等影響深遠。所以咯喎，壬辰龍年第一位龍仔嘅港人父母都有感而發，希望港府能夠阻截雙非孕婦。

香港孕婦希望有床位生仔，呢個新年願望絕對合情合理。之不過咁，夕陽政府等收工，喺雙非孕婦問題一味做鴕鳥，煲呔曾推出四招所謂嘅行政措施，治標唔治本，睇嚟本地準父母嘅新年願望都好難夢想成真咯！

其實，正如好多學者話齋，要堵塞內地孕婦問題，最好提請人大釋法，一了百了，點解煲呔曾置若罔聞呢？你畀網民叫「特狗」啫，唔係「特豬」吖，唔通孰輕孰重都唔識分？

三百幾名龍仔龍女集體許願，應該祝願港府高官龍馬精神，返工唔好再渾渾噩噩，解決雙非孕婦問題，咁就阿彌陀佛，叮！